Fréttir

Kæru félagsmenn,

Rétt í þessu undirritaði samninganefnd FFR samkomulag um framlengingu kjarasamnings FFR og Samtaka atvinnulífsins vegna Isavia ohf. Á allra næstu dögum fara fram kynningar á samningi og rafræn atkvæðagreiðsla félagsmanna í kjölfarið.

|

Lífeyrismálin

Við bendum félagsmönnum á áhugaverða umfjöllun BSRB um lífeyrismálin á vefsíðu þeirra.

 

https://bsrb.is/um-bsrb/frettir/frett/2017/04/04/Spurningar-og-svor-um-lifeyrismalin-a-vefinn/

|

UMSÓKNIR UM LEIGU ORLOFSHÚSA FFR SUMARIÐ 2017

Félagsmönnum er bent á að nú hefur verið opnað fyrir umsóknir um vikuleigu orlofshúsa félagsins sumarið 2017.

Til þess að sækja um vikudvöl í orlofshúsi félagsins skrá félagsmenn sig inn á orlofsvef Félags Flugmálastarfsmanna ríkisins og velja flipann UMSÓKN SUMAR.

Félagsmenn FFR geta sent inn allt að 5 umsóknir hver og er boðið upp á að leigja hús í Munaðarnesi, Vestmannaeyjum og íbúð á Akureyri.

Við vekjum athygli á því að leigutími er mánudagur til mánudags. Leiguverð er óbreytt 23.000 kr. fyrir vikuleigu, auk 24 punkta af punktainneign félagsmanns.

Umsóknarfrestur er til og með 17. apríl og fer úthlutun fram þann 18. apríl.

|

Aðalfundur FFR 2017

 

Aðalfundur FFR verður haldinn fimmtudaginn 30. mars 2017, kl. 18:00 á Radisson Inn hotel, Hafnargötu 57, Keflavík.

Við höfum stofnað viðburð á fésbókarsíðu félagsins vegna aðalfundar og hvetjum menn til þess að skrá þar mætingar til að auðvelda okkur innkaup fyrir fundinn!

Í dag er kjarasamningur FFR við SA/Isavia fallinn úr gildi og vinnur samninganefnd félagsins um þessar mundir að nýjum samningi fyrir félagsmenn.   

Við hvetjum alla félagsmenn til þess að skrá viðburðinn inn á dagatalið og fjölmenna á aðalfundinn. 

Stjórn FFR

Fundarboð aðalfundar FFR 2017

|

Afmæliskveðja formanns

Hinn 13. desember árið 1946, komu um 26 manns saman á Hótel Winston kl 17:30. Tilefnið var að stofna starfsmannafélag/stéttarfélag. Upphafleg lög félagsins voru nokkru frábrugðin lögum félagsins í dag og var tilgangur stofnunar félagsins að auka samhug og samstarf í öllum greinum.  
Frá upphafi var mikil gróska í félaginu og þann 26. febrúar 1947 (tveimur og hálfum mánuði eftir stofnun félagsins) var fyrsti aðalfundur þess haldinn. 
Þá var skýrt frá því að FFR hefði staðið fyrir áramótadansleik ásamt tveimur skemmtikvöldum með ágætum árangri! Á fyrstu árum félagsins reyndi strax á mikilvægi félags sem FFR og ber þá helst að nefna hópuppsagnir, skipulagsbreytingar og húsnæðisskort. Frá upphafi var félagslífið með ágætum. 
Með lögum nr. 55 frá 28. apríl 1962 fengu opinberir starfsmenn samningsrétt en þá eingöngu til handa heildarsamtökum BRSB. Í kjölfarið hófst kjarabarátta félaganna við fjármálaráðherra f.h. ríkisins. Þannig var svo málum háttað í um áratug.
Á árunum 1968-1969 var mikil vinna lögð í að framkvæma starfsmat fyrir starfsmenn og stóðu vonir til þess að starfsmatið myndi auðvelda samningagerð og gerði hana réttlátari. 
Starfsmatið átti að vera til hliðsjónar við eina samningsgerð en því var hafnað af ríki og sveitarfélögum og þótti mönnum því öll sú vinna fara fyrir lítið. Starfsþættir sem teknir voru til greina við gerð starfsmatsins voru: menntun, starfsþjálfun, sjálfstæði/frumkvæði, tengsl, ábyrgð, reynsla, vinnuskilyrði.
 
Í tilefni af 70 ára afmæli félags flugmálastarfsmanna ríkisins í dag, þann 13. desember 2016 hefur stjórn félagsins ákveðið að bjóða félagsmönnum að gæða sér á kökum á starfsstöðvum þeirra.   
Með hverju starfsári sem líður, er vöxtur á öllum sviðum fluggeirans, það skilar sér í auknum fjölda félagsmanna ásamt fjölda nýrra starfa/starfsheita. Félagsmenn FFR taka nýjum áskorunum daglega við það eitt að halda flugsamgöngum gangandi. 
 
Stjórn FFR hefur þegar hafið vinnu við kröfugerð vegna komandi kjarasamnings við SA/Isavia. Núverandi kjarasamningur er í gildi til 28. febrúar 2017. Framundan er því ljóst að reyna muni á samstarf og samhug félagsmanna FFR og ekki síður Isavia.
 
Kæru félagsmenn FFR, til hamingju með 70 ára afmælið!
 
Helgi Birkir Þórisson
Formaður FFR.
|

Vinnufundur vegna kjarasamninga

Ágæti félagsmaður,

Laugardaginn 19. nóvember 2016 kl. 11:00 boðar stjórn FFR til vinnufundar allra félagsmanna vegna komandi kjarasamningaviðræðna. Fundarstaður verður í Flugröst, Nauthólsvegi 99, Reykjavík.

Á fésbókarsíðu FFR hefur verið stofnaður viðburður sem félagsmenn eru hvattir til þess að finna og skrá mætingu á vinnufundinn. Afar mikilvægt er að öll starfsheiti félagsmanna okkar hjá Isavia hafi fulltrúa á fundinum.

Við hvetjum alla starfshópa til þess að funda með sem flestum starfsfélögum sínum fyrir sjálfan vinnufundinn til þess að undirbúa skilvirkar umræður og hópavinnu á sjálfum vinnufundinum.

Á vinnufundinum munum við skipta fundargestum í hópa miðað við starfssvið og að vinnu lokinni vonumst við til þess að hafa kröfugerðir hvers starfshóps tilbúnar fyrir næstu viðræður.

Félagsmenn eru því hvattir til þess að kynna sér vandlega núverandi kjarasamning og átta sig vel á því hvaða hliðar kjaramálanna mættu betur fara. Áríðandi er að móta skýra kröfugerð áður en viðræður sjálfar hefjast og til þess er innlegg allra félagsmanna bráðnauðsynlegt. Félagsmenn okkar mynda stóran og fjölbreyttan hóp starfsmanna Isavia og er það ætlun okkar að ná til þeirra allra með þessum vinnufundi. Trúnaðarmenn hvers hóps eru hvattir til þess að taka forystu innan hópsins, leiða umræður og fundi og hvetja alla til þátttöku.

Þeir félagsmenn sem staðsettir eru á landsbyggðinni eru beðnir um að hafa samband við stjórn vegna ferðakostnaðar.

Með von um góðar undirtektir,

Helgi B. Þórisson, formaður FFR