Ágæti félagsmaður,
Laugardaginn 19. nóvember 2016 kl. 11:00 boðar stjórn FFR til vinnufundar allra félagsmanna vegna komandi kjarasamningaviðræðna. Fundarstaður verður í Flugröst, Nauthólsvegi 99, Reykjavík.
Á fésbókarsíðu FFR hefur verið stofnaður viðburður sem félagsmenn eru hvattir til þess að finna og skrá mætingu á vinnufundinn. Afar mikilvægt er að öll starfsheiti félagsmanna okkar hjá Isavia hafi fulltrúa á fundinum.
Við hvetjum alla starfshópa til þess að funda með sem flestum starfsfélögum sínum fyrir sjálfan vinnufundinn til þess að undirbúa skilvirkar umræður og hópavinnu á sjálfum vinnufundinum.
Á vinnufundinum munum við skipta fundargestum í hópa miðað við starfssvið og að vinnu lokinni vonumst við til þess að hafa kröfugerðir hvers starfshóps tilbúnar fyrir næstu viðræður.
Félagsmenn eru því hvattir til þess að kynna sér vandlega núverandi kjarasamning og átta sig vel á því hvaða hliðar kjaramálanna mættu betur fara. Áríðandi er að móta skýra kröfugerð áður en viðræður sjálfar hefjast og til þess er innlegg allra félagsmanna bráðnauðsynlegt. Félagsmenn okkar mynda stóran og fjölbreyttan hóp starfsmanna Isavia og er það ætlun okkar að ná til þeirra allra með þessum vinnufundi. Trúnaðarmenn hvers hóps eru hvattir til þess að taka forystu innan hópsins, leiða umræður og fundi og hvetja alla til þátttöku.
Þeir félagsmenn sem staðsettir eru á landsbyggðinni eru beðnir um að hafa samband við stjórn vegna ferðakostnaðar.
Með von um góðar undirtektir,
Helgi B. Þórisson, formaður FFR
KVENNAFRÍ 2016 – KJARAJAFNRÉTTI STRAX!
Konur eru hvattar til að leggja niður vinnu kl. 14:38 mánudaginn 24. október og fylkja liði á samstöðufund á Austurvelli, kl. 15:15 undir kjörorðinu KJARAJAFNRÉTTI STRAX!
Meðal atvinnutekjur kvenna eru 70,3% af meðal atvinnutekjum karla. Konur eru því með 29,7% lægri meðaltal atvinnutekna. Samkvæmt því eru konur búnar að vinna fyrir sínum launum eftir 5 klukkustundir og 38 mínútur miðað við fullan vinnudag frá kl. 9–17. Daglegum vinnuskyldum kvenna er því lokið kl. 14:38.
Þann 24. október árið 1975 lögðu konur um allt land niður vinnu til að sýna fram á mikilvægi vinnuframlags kvenna fyrir þjóðfélagið. Árið 2005 héldum við upp á kvennafrídaginn í annað sinn og konur gengu í tugþúsunda talið útaf vinnustað á þeirri mínútu þegar þær hættu að fá borgað fyrir störf sín miðað við karla. Þá gengu konur út klukkan 14:08. Árið 2010 gengu konur út klukkan 14:25. Nú göngum við út klukkan 14:38. Við höfum grætt hálftíma á ellefu árum. Tæplega þrjár mínútur á hverju ári. Með þessu áframhaldi þurfum við að bíða í 52 eftir að hafa sömu laun og sömu kjör og karlar, til ársins 2068! Það er óásættanlegt!
Fylgstu með á www.kvennafri.is og www.facebook.com/kvennafri.
Elín Björg Jónsdóttir, formaður BSRB, fer yfir stöðuna í lífeyrismálum í bréfi til félagsmanna aðildarfélaga bandalagsins. BSRB hefur, eins og önnur heildarsamtök opinberra starfsmanna, skrifað undir samkomulag við ríki og sveitarfélög um framtíðarfyrirkomulag lífeyrismála.
Eins og fram hefur komið hér á vef BSRB og annarsstaðar tryggir samkomulagið að réttindi þeirra sem greitt hafa í A-deildir lífeyrissjóða opinberra starfsmanna breytist ekki. Þá hefur einnig komið fram að ríki og sveitarfélög hafa skuldbundið sig til að leiðrétta launamun á milli opinbera markaðarins og hins almenna.
Í bréfi sínu fer Elín yfir hvernig ferill þessa flókna og viðamikla máls hefur verið innan bandalagsins. Hún segir að frá upphafi hafi verið fjallað um málið á lýðræðislegan hátt innan bandalagsins. Þannig hafi formenn allra aðildarfélaga bandalagsins samþykkt það árið 2010 að leggja í þessa vegferð. Málið hafi verið tekið upp á öllum fundum og þingum síðan.
Formannaráð BSRB, sem er æðsta vald bandalagsins milli þinga, tók málið fyrir á fundi ráðisins í byrjun september. Ráðið samþykkti að fela forystu BSRB að skrifa undir samkomulagið og var það gert síðastliðinn mánudag.
Bréf formanns BSRB má lesa í heild sinni hér að neðan.
Kæri félagi
BSRB hefur, ásamt öðrum heildarsamtökum opinberra starfsmanna, skrifað undir samkomulag við ríki og sveitarfélög um framtíðarfyrirkomulag lífeyrismála.
Nokkur atriði sem mikilvægt er að hafa í huga varðandi samkomulagið:
Vinna við heildarendurskoðun á lífeyriskerfinu hefur verið í gangi frá árinu 2009 þegar aðilar á vinnumarkaði og stjórnvöld gerðu stöðugleikasáttmála. Það er afar mikilvægt að nú hafi náðst samkomulag um nýtt lífeyriskerfi fyrir allt launafólk á Íslandi. Það er hluti af því markmiði að ná sátt á vinnumarkaði og bæta vinnubrögð við gerð kjarasamninga.
Markmið BSRB og annarra heildarsamtaka opinberra starfsmanna var frá upphafi að tryggja óbreytt réttindi allra sem þegar greiða í opinbera lífeyrissjóði, en einnig að gæta að réttindum framtíðarfélaga í sjóðunum.
Öll þau markmið sem lagt var upp með við upphaf viðræðna náðust fram í viðræðum við ríki og sveitarfélög. Að engu var anað í viðræðunum og áherslan alltaf sú sama, að gæta hagsmuna okkar félagsmanna í hvívetna.
Frá upphafi hefur verið fjallað um málið á lýðræðislegan hátt innan BSRB. Formenn allra aðildarfélaga bandalagsins samþykktu formlega árið 2010 að leggja af stað í þessa vegferð. Fjallað hefur verið á tveimur þingum bandalagsins, auk þess sem málið hefur verið reifað á fundum formannaráðs og stjórnar reglulega. Alltaf hefur niðurstaðan verið sú sama. Forystu BSRB hefur verið falið að halda viðræðum áfram á þeim grunni sem lagt var upp með.
Formannaráð BSRB, sem er æðsta vald þess milli þinga, fjallaði um málið á fundi ráðsins sem fór fram í Reykjanesbæ í byrjun september. Þar var farið ítarlega yfir niðurstöðu í samningaviðræðum opinberra starfsmanna við ríki og sveitarfélög. Formannaráðið samþykkti að fela forystu BSRB að skrifa undir samkomulagið og var það gert síðastliðinn mánudag.
Vinnunni er ekki lokið þó samkomulagið hafi verið undirritað. Ríki og sveitarfélög hafa skuldbundið sig til að meta heildstætt launamun á opinberum markaði og hinum almenna. Þá hafa viðsemjendur okkar skuldbundið sig til að verja þeim fjármunum sem þarf til að launamuni milli markaða verði útrýmt á næstu tíu árum. BSRB mun fylgja þessari vinnu vel eftir og tryggja að leiðrétting á launum opinberra starfsmanna nái fram að ganga.
Nánar er fjallað um samkomulagið á vef BSRB, www.bsrb.is og verður frekara kynningarefni útbúið á næstu dögum og vikum. Við hvetjum við þig til að kynna þér málið.
Með kveðju,
Elín Björg Jónsdóttir
Formaður BSRB
Við hvetjum félagsmenn til þess að kynna sér námsframboð Starfsmenntar í vetur. Framboðið er glæsilegt og flestir ættu að finna eitthvað áhugavert, langflest námskeiðin eru félagsmönnum að kostnaðarlausu http://smennt.is/.
Ágætu félagsmenn, haustið hefur laumast upp að okkur og ekkert lát er á veðurblíðunni sem leikið hefur við landsmenn í allt sumar. Við viljum vekja athygli ykkar á því að nú hefur verið opnað fyrir bókanir í orlofshúsum félagsins fyrir vetrartímabilið sem þegar er hafið. Fáir hafa bókað tímabil enn sem komið er og viljum við hvetja ykkur kæru félagsmenn til þess að kíkja á vefinn okkar http://orlof.is/ffr/ þar sem þið getið athugað hvort að þið getið nýtt ykkur orlofshúsakosti félagsins komandi misseri og skipulagt notalegar stundir með fjölskyldunni eða góðum vinum. Engir punktar eru greiddir fyrir vetrarleigu í húsunum og fyrstur kemur - fyrstur fær. Stjórn FFR sendir kveðjur og hlakkar til samstarfsins í vetur.
Góðan daginn kæru félagsmenn,
við viljum vekja athygli ykkar á því að margar vikur eru lausar í orlofshúsum félagsins í ágúst. Endilega kíkið inn á orlofsvefinn og athugið hvort að þið getið nýtt ykkur einhverja orlofshúsakosti FFR á næstunni http://orlof.is/ffr/site/rent/rent_list.php.
